domingo, 31 de xullo de 2011

PRIMEIROS DÍAS DO MERCADO MARIÑEIRO DE SADA

Xa rematou o segundo día do Mercado Mariñeiro, ainda nos queda hoxe domingo.

Ó longo destes dous días traballamos moito, pero moito, moito, pero as cousas foron saíndo máis ou menos ben. E o resultado global podemos calificalo como de moi bó.

O venres pola tarde quitamos os barcos do mar e os levamos para o noso stand.

A dorna saeu dende a rampa e os outros barcos dende o travelling do porto deportivo.

Camuflamos a carpa co atrezzo e o material de exposición. Tremenda carpa que tiñamos, como vedes nas fotos.

O sábado o único que nos fallou foi a demostración de carpintaría de ribeira na rúa por estar ausentes os carpinteiros, pero contamos coa Exposición da Ferramenta de Carpintaría de ribeira, coa Exposición temática sobre a Balbina e coa Exposición de imaxes antiguas de Sada que tiveron moitísimo éxito.

Fixemos tamén unha recreación do encascado de redes e velas. A xente se xuntaba alí porque parecía que estábamos facendo polbo á feira.

Era moi bonito ver como a xente mallor se emocionaba, algún ata chegou a botar unhas lágrimas, vendo as fotos e contándonos as súas esperiencias. Que si aquí había unha fábrica de gaseosas, que si eu descarguei moito patexeo, que si tiven que limpar moitos barcos patexeiros, que era moi bonito ver os carros de vacas e as "zorras" na praia cargando o patexo dende as lanchas patexeiras, que si traballaron na Balbina, etc...

Só por ver e oir os comentarios desa xente valeu a pena facer todo este traballo e estar días sen ver á familia por estar no stand da feira.

O mestre carpinteiro e socio de honra dos Patexeiros, D.José Luis Lino  tamén nos visitou e desta nos axudou dando explicacións ós visitantes de como era Sada no pasado, explicándolles as fotos que tiñamos na carpa.

O sábado pola tarde sobre as 4 e media, tivo lugar a reunión de patróns dos barcos que participarían na regata da Copa Balbina para recibir instruccións do comité da regata.



Sobre as seis da tarde celebramos a regata da Copa Balbina cunha grande asistencia de barcos, como podedes ver nas fotos. Alí estaban o Sauntress, o Canouro, o Arxil, o Osorio, a Desexada, e moitos máis.


Grazas a todos, amigos, por asistir a esta regata e axudarnos desa maneira.

O gañador desta regata, por suposto, o Sauntress, seguido polo noso novo barco da flota patexeira, a Desexada.

Ó acabar a regata, como non podía ser doutra maneira agasallámolos cuns pinchos e unhas cervexas, viño e refrescos.

Un pouquiño máis tarde das 8 tivo lugar diante da carpa a actuación de Cántigas da Terra. Unha actuación que aportamos ó Mercado Mariñeiro e financiada pola Deputación da Coruña..

Xuntóuse moitísima xente a ver a actuación. Tanto dentro como fora da carpa.


Cántigas estivo tocando, e tocando, e tocando ata casi as 12 da noite. Grazas tamén amigos, por facernos desfrutar da música e da vosa compaña.  Podédelos escoitar neste vídeo



E sobre as 12 e media da noite, pechamos a carpa, porque xa todo o mercado estaba pechado.

Queremos darlle as grazas especialmente ó Concello de Sada pola colabouración, a Marcos o Técnico de Cultura do Concello por desvivirse para que todo saíra ben (este home traballaba 26 horas ó día, era increíble), ó señor Lino que outro ano máis se veu preocupar por nós e a darnos explicacións, ás Redeiras de Lorbé (que ainda que non poideron vir polas baixas, Maruja se achegou a deixarnos as redes para encascar), a todos os participantes na Copa Balbina, ó Clube Náutico Recreativo de Sada por apoiarnos na regata, ó porto deportivo por deixarnos amarrar os barcos da Copa Balbina, a Cántigas da Terra por agasaiarnos coa súa música e por suposto, ó máis importante, a todo o público que nos visitou nestes días.



Iremos subindo as fotos destes primeiros días no noso álbum. Hoxe estamos moi cansados.

Palmeirán

martes, 26 de xullo de 2011

II FEIRA MARIÑEIRA DE SADA

  Xa pasou un ano desde que participamos na Feira mariñeira. E ¿que significa isto? Que xa estamos para outra.
  Xa vos podedes imaxinar  a que imos montar en Sada este fin de semana. Podedes achegarvos alá a darnos bos consellos (o típicamente galego"Asi non e"), a mercarnos unha camiseta, unha cunca, a ver a Exposición - museo da Balbina, a aprender algo mais de nós mariñeiros, a criticarnos, a facervos unha foto coa regata de vela tradicional de fondo, a saborear as sorpresas que teremos para os vosos paladares, ou sinxelamente,   A SAUDARNOS

   Tamén, xa sabedes, que estaremos alá para nun brevísimo prazo abrir a preescripción para solicitar participar no concurso - oposición para facerse socio dos Patexeiros. Ahí falade con nós, que estemos dispostos a informaros.

    Anímovos especialmente aos que tedes embarcacions que vos alistedes na regata, que logo en terra daremos pinchos, e temos un concerto de música tradicional na nosa carpa de o grupo "CANTIGAS DA TERRA".

   Por certo, agora que falamos de regatas, decirvos que o Jaime, vai de lider na Copa Balbina, e que quedamos de 10 posto sobre un total de 23 na regata de Redes do pasado sábado.

   Ide ahí na páxina a descargas xerais e en "regatas e outros eventos" poderedes ver como foi todo de momento neste ano, na folla de Excell.

   Ahí podedes ver todas as clasificacions deste ano. Jaime, quedou de lider co pepe do osorio a 2 puntos na clasificación xeral.

   Volvendo á Feira, decirvos tamén que teremos o privilexio de compartir carpa coa Asociación de redeiras de Lorbé. Toda unha tradición viva. Se queredes saber algo sobre otema, alá estarán .

   E por último, deixovos aquí o programa de actividades previsto para a Feira Mariñeira na nosa carpa:

VERNES 29:



19:00: Montaxe da Exposicion de embarcacions tradicionais na beira da carpa dos Patexeiros


20:00 Montaxe e inauguración das exposicions na carpa:


Exposición : “ A Balbina, o derradeiro patexeiro”. Exposición de obxetos relacionados co barco, pezas restauradas, en restauración, exposición fotográfica do proceso de restauración, e instalación do mural – concurso “¿Onde estaba a Balbina no 1960?”


Exposición: “A ferramenta da carpintería de ribeira tradicional”. Exposicion da colección das pezas da colección de ferramenta de carpinteria tradicional da Asociación.


SABADO 30:


10:00


Montaxe do obradioro de carpintería tradicional na beira da carpa. Comenzo da actividade “Carpintería de ribeira na rua”


12:00


Actividade no Obradoiro: “O Calafateado tradicional con estopa e Brea”. Demostración de calafateado de xeito tradicional dunha das embarcacions expostas, calafateando ao xeito tradicional con estopa e Brea.


16:00


Presentación da regata de vela tradicional. Presentación do percorrido e participantes.


17:00


Comenzo da proba na auga. Regata de embarcacuions tradicionais enfrente o mercadiño Mariñeiro.


19:00


Entrega de diplomas para participantes na regata. Reunión de tripulacions na carpa dos Patexeiros. Pinchos para os participantes.






20:00


Concerto do grupo “CANTIGAS DA TERRA” de música tradicional. Dentro do marco de circuito de actuacions culturais financiado pola Excma. Diputación da Coruña, na carpa dos Patexeiros.






DOMINGO 31:


10:00


Comenzo do obradoiro permanente de carpintería na rua.


12:00


Obradoiro de redes . Demostración do proceso tradicional de encascado das redes de algodón, no que se teñían as redes con cáscara de Piñeiro para a sua conservación.


16:00


Reanudación do obradoiro de carpintería


17:00


Obradoiro de nos mariñeiros para participaren o público da feira de xeito gratuito.


19:00


Actividade divulgativa gratuita para o público: Explicación das distintas tipoloxías de embarcacions expostas e os seus usos na pesca. Demostracion das manobras fundamentais da vela tradicional.


20:00 Fin de festa coa tradicional BOTADURA DAS EMBARCACIONS NA PRAIA DE SADA


Acto co que se clausura a exposición en terra de embarcacions e no que o público da feira pode participar. As embarcaions son trasladadas á beira do mar , na Praia onde marcharán por mar ateo o ano que ven.

mércores, 13 de xullo de 2011

REMATOU O X ENCONTRO

E foise...., rematou...., botou o último suspiro.... O X Encontro de Embarcacións Tradicionais de Galicia abandoou Carril este pasado domingo dia 3.


Este ano os organizadores non o tiveron fácil. Os compañeiros de Rompetimóns non tiveron toda a axuda institucional que precisaron. Vamos, non é que non a tiveron toda, e que tiveron demasiado pouca, incluso ningunha de algunha institución.
 
Porque parece ser que conservar o patrimonio non está de moda. "Esos barquitos de madera son bonitos pero son un atraso" seguro que pensan algunhas "mentes pensantes" de algunha institución.

A culpa lévaa a crise económica. Pero tiñan que pensar que barcos como estes sacaron da crise a moitas xeracións, déronlles de comer a moitas bocas, e fixeron que algúns poidesen estudar esa carreira que lles permiteu estar hoxe ónde están. Pero diso ó mellor xa non se acordan.


Pois tranquilos, que xa conservamos nós o PATRIMONIO DE TODOS.

Bueno, ó caso.

Foi unha semán intensa para os organizadores.

Vilaxoán daba a benvida o anterior fin de semán ós primeiros barcos que alí estiveron dous días. E dende o pasado xoves 30 foi Carril a localidade anfitriona.

Foron máis dun cento de barcos os que se viron eses días por alí. Non estou seguro se irían todos os que estaban inscritos, pero ainda así había moitos barcos, e sobre todo había moitos amigos.

Unha marea de dornas, como non podía ser doutra maneira, pois estábamos na Ria de Arousa. Dornas polbeiras, xeiteiras, de tope, mecas, dornas nai, dornas e máis dornas. Daba gusto velas navegar pola súa Ría.

Alí estaban tamén os grandes barcos do Encontro: o Raquel C, o Cassandra, o Joaquin Vieta, o Ría de Ferrol, tamén o Rei do Mar, o Illa de Cortegada, o RH1, o Novo Sofía, o Ave de Paso, moitos, moitos e bonitos barcos que podedes ir vendo no noso  Album de fotos

Por certo, que o Ría de Ferrol levou durante todo o Encotro un extrano tripulante con pico, plumas, dúas patas e cresta, que uns decían que era galo e outros galiña, e que misteriósamente desapareceu o último día. Non sabemos se Bedoya tería algo que ver con esa "desaparición" vendo o orgulloso que luce a súa "proa".

E amigos de todos os recunchos deste país e dos do lado. Amigos de Euskadi que trouxeron varias embarcacións, de Catalunya, de Cartaxena, de Portugal e de Francia. Perdoade se me olvido de algún.

Polas mañáns os barcos estaban no peirao, e as tripulacións empezábanse a levantar uns e xa estaban a bailar e cantar os outros. Festa, moita festa.

Polas tardes saíamos a navegar pola fermosa Ria de Arousa.

O noso Arredemo saeu a navegar todolos días. Unhas veces tripulado por Jaime e Palmeirán, outras por Miguel e Palmeirán e o domingo  polos tres xuntos.

Ensaiamos a que xa vai ser coñecida como "a manobra de Miguel". Este home que é un estudoso da vela latina alá estivo dous días estudando a maneira de poñer a entena en cruz co mastro para navegar en empopadas. ¡¡¡ Imos a facer unha manobra espectacular !!!! Esa era a súa frase, e eu acojonado por se saía mal e facíamos o ridículo diante de tanto portento da navegación tradicional. E este home insisteu e insisteu ata que ó final foi. Haberá que ver as fotos que nos sacaron, a ver se realmente é espectacular. Navegar, si navegaba ben coa vela así.


O venres pola tarde Jaime e máis eu tivemos a sorte de navegar durante máis de 20 minutos entre os arroaces. Xogaban con nós, pasábannos por debaixo do barco, pegabannos chimpos na proa. Eles tamén estaban contentos de estar en Carril.


E o domingo cando nos achegamos ó peirao levámonos unha sorpresa. Alí fondeado estaba o Tina Husted de David (léase Deivid). Cando saíamos a navegar esa mañán baixamos a terra a falar con David e Maca, que nos explicaron que na súa singladura dende Sada, debido ás condicións do mar e do vento tiveron que demorar a súa chegada ata a madrugada do domingo, perdéndonse casi todos os días dos encontros. A David gustóulle tanto a Ría de Arousa que dixo que él se iba a quedar alí unhas cantas semáns.

Tivemos a oportunidade de visitar a Illa de Cortegada, que forma parte do Parque Nacional das Illas Atlánticas. Lanchas da Organización nos forron acarrexando en gurpos ata o peirao da Illa e alí poidemos dar unha volta polos sendeiros que a circundan e ver a antiga aldea e a capilla.


As comidas e as ceas eran estupendas, xuntábamos cos amigos de outras asociacións e ó acabar empezaba a troula. Gaitas, tamboriles, pandeiretas, cunchas, bombos, valía de todo.¡ Moita festa, moita festa.!


O domingo despóis de comer, as voluntarias que nos deron de comer todos os días, déronnos unha sorpresa. Despediron o encontro cantando a canción Fisterra. E facíano tan ben, e con tanto sentimento que se vían moitos ollos brilantes entre os asistentes, e seguro que algunha bágoa chegou ó chan.

Os barcos empezaron a marchar, uns por terra, outros por mar, e outros como o Arredemo, un pouquiño por mar (ata o camping) e alí tras subilo ó carro xa por estrada de volta para Sada.

Adeus X Encontro, xa estamos esperando o XI.

Agora a esperar outros dous anos para ver a donde nos levan as nosas proas.

Palmeirán

venres, 1 de xullo de 2011

PRIMEIRO DÍA NO ENCONTRO

Onte xoves, uns cantos Patexeiros estivemos na primeira xornada do X Encontro en Carril, recordade que este X Encontro xa empezou este pasado fin de semán en Vilaxoán

Ana, Miguel e Jaime xa levan toda a semán alí e eu acheguéime onte á tarde a ver un pouco o ambiente.

Nada máis entrar ó recinto portuario tedes a carpa da Organización, atendida por Noelia, a guapa e eficaz secretaria da Federación, e outras guapas rapazas, na que podedes mercar os tickets para as comidas e as ceas. A continuación teredes unhas carpas amosando oficios artesanais, logo veñen outra serie de carpas dos organizadores e de outras Asociacións. Tamén está a piscina para que naveguen os rapaces. E unha grande carpa destinada á apertura dos Encontros e ó servicio de restaurante.

Por alí nos atopamos e saudamos a varios membros da Federación (Victor, Pablo Carrera, Xocas, etc...) (destes xa non vos vou a decir se son guapos ou non, jajajaja)

Á tardiña ainda estaban chegando moitas das embarcacións que xa viñan de Vilaxoán. Debido ó forte nordés que sopraba , a meirande parte delas tiñan que ser remolcadas polas lanchas da organización.


Alí xa se atopan, entre outras o Ría de Ferrol, o Illa de Cortegada, o Rei do Mar, a Dorna Nai da Cofradía da Dorna, a Ravandeira, A Meca, a Peza de Rabo, a Nova Marina, a Irmandiña, parecéume ver chegar á Jalerna da Cofradía da Dorna, o Canouro, o Bote de Pau, varios barcos dos de Bouzas, varias dornas dos de Lajareu (a Moura, a Xaimiña....), un barco vikingo dos que están fondeados nas Torres de Catoira, varios barcos dos amigos de Euskadi,e tamén algún de Cataluña, incluso algún de Huelva, tamén un francés, e moitos máis,.... e como non o Arredemo, o noso barco máis fiel a estes eventos.


Non pudo ser, non pudemos levar este ano a Balbina, tampouco pudo estar a Betty, nin o Galeón, nin ese novo barco que xa temos a tiro e do que xa vos contaremos máis cousas, pero para o seguinte fixo que van.

Asistimos ó acto de apertura oficial, coa presencia do Presidente da Federación, o Director do Museo do Mar de Galicia, o Alcalde de Vilagarcía, a Conselleira do Mar e Conselleira de Cultura.

Logo procedemos á ceremonia de izado das velas, que nalgúns casos se fixo moi dificultoso para os barcos que estaban atracados ó través debido ó forte vento.

Moitos amigos, moitos coñecidos que enseguida se volven amigos, e outras caras novas que tamén pasarán a ser amigos.

Barcos, madeira, velas, música, Uxío cantando, xente bailando, ... estos son os Encontros..... e que non pare a festa

Palmeirán
A miña foto
Asociacion cultural en defensa da conservación do patrimonio marítimo, o litoral e a cultura mariñeira. Contacta con nós no CORREO: patexeiros@hotmail.com ou ben no noso FORO: http://patexeiros.foroactivo.com