domingo, 25 de novembro de 2012

Coincidencias da vida

Recordaredes que fai un par de meses vos dábamos conta nesta páxina da operación de rescate dun vello motor Larrán varado nunha praia.

Como vos comentábamos daquela, fixéramos o rescate por motivos sentimentais ó tratarse dun motor da marca Larrán, e por motivos ecolóxicos para manter limpa a praia.

Fai uns días falando cuns mariñeiros no porto de Lorbé levámonos ademáis unha grata sorpresa ó intentar averiguar de qué barco procedía aquél motor.

Pois non volo ides a crer, pero ese motor pertencía ó NELOS, o barco xemelgo da nosa BALBINA, que se fora contra as pedras hai xa varios anos a causa dun forte temporal.

O Nelos pertencía ó mesmo armador que a Balbina e tamén se adicaba á captura do patexo.

Podédelos ver xuntos nesta foto dos anos 50 na praia de Sada.

O que é a vida, rescatámolo sen saber que era da familia. Agora xa forma parte do Museo Patexeiro.

Palmeirán

domingo, 18 de novembro de 2012

O Freixo-Outes acollerá o XI Encontro de Embarcacións Tradicionais

 Foto da páxina do Concello de Outes

Así se acordou por unanimidade na Asamblea da FGCMF celebrada este sábado en Castrelo-Cambados.

A candidatura foi presentada pola Asociación Terra de Outes, que contará coa implicación das Asociacións da Federación, Mar de Muros, Canle de Lira, A Ostreira de Abelleira, Mar de Noia e Joaquín Vieta, para poder levar a cabo este proxecto.

Asimesmo tamén contan coa colaboración do Concello de Outes, as Cofradias de Pescadores, e varias asociacións veciñais que se comprometen a prestar axuda e voluntariado para poder levar adiante o XI Encontro.

Dende a A.C.M. Os Patexeiros desexámoslle moita sorte coa organización deste gran evento, e pola nosa parte, empezaremos dende xa a preparar os barcos para poñer proa ó Freixo alá por xullo de 2013. As datas fixas ainda non están confirmadas.


xoves, 15 de novembro de 2012

Embarrancamento do galeón Punta Pragueira

O pasado fin de semán, do 3 de novembro, os compañeiros de Amigos das Embarcacións Tradicionais da Coruña recibiron unha chamada que a bo seguro nunca desexarían ter recibido.

O mariñeiro do C.N. de Ares lles daba a mala nova de que o galeón Punta Pragueira estaba embarrancado nunha furna preto do Clube Nautico.

Parece ser que unha desas noites de temporal se soltou do amarre en Lorbé e atravesou toda a ría para quedar varado na Cova da Pedra Feita de Ares.

Ese mesmo sábado alá se achegaron a velo, pero en seguida se fixo noite e ese día xa non poideron facer nada.

Ó día seguinte, varios membros da Asociación da Coruña acompañados por uns cantos Patexeiros acudiron a intentar reflotalo e sacalo das pedras. 

Todo o día estiveron intentando tapar os furados que tiña con madeira, trapos e espuma de poliuretano, pero a auga que entraba, a area que tiña dentro sumada ós kilos de plomo de lastre que ten o barco facían imposible sacalo de entre as pedras.

Chegaron cansos e derrotados do intento. A desesperación era total, podía ser que o forte mar de fondo que había eses días se cebara co barco e o destrozara complétamente.

O luns avisaron ó seguro para que enviasen ó rescate, sempre que quedase algo que rescatar.

O mar de fondo amainou un pouco e quedaron en que enviarían a un buzo e o rescatarían o mércores.

O xoves día 8 nos chegaron novas de que o barco xa estaba a salvo no peirao de Ares.

Venres 9, pola mañán o levaron por mar a Lorbé, abarloado ó barco do buzo e sobre as 11 da mañán xa estaba na rampa do estaleiro.

Como podedes ver polas fotos ten bastante traballo.

O costado de estribor está bastante destrozado, ten varios boquetes. Aquí o vedes ainda como estaba botando a auga do interior.



 O botalón está roto, e a unión da roda coa quilla tamén.

A sorraina e a tapa regala están totalmente arrancadas.



 A quilla está destrozada, posíblemente a teñan que facer nova completamente ou polo menos un gran tramo.

Na popa tamén hai varios desperfectos. O codaste está roto e varios golpes nas táboas do forro. Perdeu o temón.

O motor posíblemente estará danado.

Con respecto ó costado de babor, é o menos perxudicado ainda que tamén ten traballo.

A cuberta, caseta e arboladura foron as partes menos afectadas.

Foto do costado de estribor unha vez limpo o barco de area e da espuma de poliuretano.


Esperemos que cando rematen os traballos volvamos a ter ó Punta Pragueira lucindo tal e como o recordamos.

Dende a A.C.M. Os Patexeiros queremos darlle ánimos e todo o apoio moral e loxístico que poidamos ós compañeiros da Asociación da Coruña. É moi triste ver como todo o traballo e o desembolso económico que levas feito por preservar o patrimonio marítimo se vai ó traste en cuestión de minutos.

Todos Os Patexeiros quedamos moi tristes ó coñecer a nova, e seguimos estando afectados cada vez que nos achegamos a traballar na Balbina e vemos ó seu lado ó Punta Pragueira.

Desastres como éste deberíanos servir para pelexar todos xuntos diante das Administracións, locais e autonómica para conseguir que as Asociacións que traballamos na conservación do patrimonio marítimo dispoñamos de puntos de amarre ou fondeo abrigados das inclemencias do tempo.

Temos que recordar que este incidente non é o primeiro que acontece, pasóunos a nós con varios barcos, fai dous invernos, pasou nas Rías Baixas, e non queremos que se repita algo así de novo.

Nota: Ainda que fomos coñecedores do embarrancamento do Punta Pragueira dende o primeiro día non publicamos esta nova ata hoxe por respeto ó que estaban sufrindo os compañeiros da Coruña.

 

xoves, 8 de novembro de 2012

O pequeno museo do Bar Venezuela de Sigrás

Onte pola noite, con motivo dunha Asamblea da directiva dos Patexeiros, quedamos no Bar Venezuela, de Sigrás, na estrada N-550 que vai de Coruña a Santiago.

Motor Ayon de 1 cilindro fabricado en 1926

Xa sabíamos que tiña unha colección de móviles de vento feitos con aperos de labranza, arados, etc..., pero algún patexeiro sabía ademáis que garda un pequeno tesouro. Unha pequena colección de motores marinos.
Motor Ayon de 3 cilindros

Saquéilles unhas fotos pero xa era noite e non se aprecian moi ben. De todas maneiras podedes darvos unha idea do pequeno museo.

O máis maravilloso é que falamos co propietario e nos dixo que os motores están en perfecto estado e os encende de vez en cando. Tamén nos comentou que ainda ten algún máis almacenado, e incluso nos dou algúns trucos para aplicarlle ó motor Larrán da nosa Balbina.

Así que un día a plena luz pasaremos a facerlle outra visita e vos faremos un mellor artigo sobre este pequeno museo que paga a pena velo.

Un forte e merecido aplauso para este home que ademáis de preservar o patrimonio marítimo, o mantén en perfecto estado de uso.

Se podedes, achegádevos polo Bar Venezuela en Sigrás.

Palmeirán.

venres, 2 de novembro de 2012

Nova lei de Costas

Autor: Luis Davila


A miña foto
Asociacion cultural en defensa da conservación do patrimonio marítimo, o litoral e a cultura mariñeira. Contacta con nós no CORREO: patexeiros@hotmail.com ou ben no noso FORO: http://patexeiros.foroactivo.com