martes, 25 de febreiro de 2014

XII XORNADA DO CURSO

Este pasado sábado 22, estaba previsto que rematáramos coa 4ª Edición do Curso de carpintaría, despóis da ampliación que lle fixemos.
 
A buceta xa está casi lista, e só faltan retoques por cuberta.
 
Hai que tapar as puntas, poñerlle as cornamusas, os fileretes, facer a fogonadura, o tinteiro e a tapa do cuartel, pero bueno, xa quedou totalmente forrada.
 
  

A primeira hora da xornada mentras uns botaban os pechos do forro, os demáis se puxeron a calafatear as xuntas.

Uns cos mazos tradicionais de calafate, e outros co martelo, porque non tiñamos máis mazos.
 

Meteron estopa e tamén fia de esparto. Tamén lles deixamos cordón de esparto embreado para que probaran a usar distintos tipos de materiais para carenar.

Cepillaron a roda, a quilla, etc para matar os cantos.


Aquí podedes ver un detalle do escarpe a raio de xúpiter, onde apreciades a chave (cuña de aprete) e o tornaaugas.

Unha vez rematado o traballo dentro, levóuse a buceta para o exterior do taller para lixala e suavizar as formas. 
 
 
A esta tarefa adicáronse Javier, Moncho e Dani, cada un cunha máquina distinta.
 

Durante a pausa, que xa se fixo algo tarde, aproveitamos para brindar pola buceta, e logo continuóuse cunha tertulia, pois xa non tiñan moitas ganas de traballar. E claro, como era o último día tampouco os presionamos moito. Que nas tertulias tamén se empapan de coñecementos, sobre todo cando hai xente experimentada da que aprender.


Moncho trouxo a rama de loureiro símbolo do remate do barco que se lle colocou logo no pinchón.
 
Fixemos unha pequena sesión de fotos diante da buceta, á que se uneu algún espontáneo. 


Para ser xustos, nesta foto tamén deberían estar os alumnos da anterior edición do Curso, pois foron os encargados de empezar este proxecto da réplica daquela buceta Amalia que chegara xa fai un par de anos casi destrozada ó taller de Pepe, para botarlle a cuberta, e que hoxe podedes ver no Museo do Salgado do Grove.
Aquí a tedes nunha foto do día no que a foron buscar a Mera para levala ó Grove.


Volvemos a meter dentro o barco, pois o mestre Pepe tíñanos organizada unha tremenda merenda cea de peche de curso.

Preparamos as mesas e empezaron a chegar as viandas e a correr a bebida.
 

A familia do mestre Pepe ó completo baixou ó taller, e tamén o mestre David para festexar con nós o remate do curso.

A muller de Pepe, como outros anos, deleitounos cunha fonte de orellas, outra de "buñuelos" e outra de rosquillas artesáns, que estaban todas riquísimas. Felicitámola cun grande aplauso.  Moitas grazas de parte de todos os asistentes.  Grazas tamén a Belén, por axudarlle a amasar a sua nai, ou iso nos dixo.
 

De vez en cando, os alumnos pasaban xunto á buceta e notábaselles a cara chea de satisfacción polo seu traballo.

Un alumno patexeiro orgulloso do seu traballo.
 

O mestre tamén estaba orgulloso do traballo feito polos seus alumnos de dúas edicións.
 

E o presidente dos Patexeiros tamén quixo posar diante desa fermosura de buceta pois tamén tiven que asistir durante as dúas edicións, casi todos os sábados para poder facervos os resumes das xornadas e quitar as fotos, sen sair en ningunha. Así que desta non vos librades.
 

Tamén andaba por alí este persoeiro, que algúns identificaron como Harry Potter. Non era para menos a súa ledicia, pois acababan de rematar un bo traballo.


E antes de irnos, Pepe, que xa nos sorprendera coa merendola, volvéunos sorprender decíndonos que o vindeiro sábado teríamos unha nova xornada para intentar alistala por cuberta. Outra xornada extra por xentileza do mestre carpinteiro.

Así que xa sabedes, o vindeiro sábado, DERRADEIRA XORNADA DA 4ª EDICIÓN DO CURSO DE CARPINTARÍA DE RIBEIRA E MANTEMENTO DE EMBARCACIÓNS TRADICIONAIS.

Palmeirán

domingo, 16 de febreiro de 2014

Semán de moito movemento Patexeiro

Esta semán Os Patexeiros participamos na grabación dun programa para a TVG. A grabación do mesmo tivo lugar no local Patexeiro, na carpintaría de Pepe en Lorbé e a bordo da Balbina.


Ó rematar a grabación a bordo, fixemos unha regata a remos contra o equipo do programa, para ver quen chegaba antes a porto.


Xa vos avisaremos cando sepamos a data de emisión.

Por outra banda, hoxe sábado tivo lugar no local Patexeiro a Asamblea Anual Ordinaria, na que se presentou o balance de contas do ano 2013, fixemos un resumo das actividades feitas durante o 2013, aprobáronse as actividades e investementos a facer neste ano 2014,  aprobamos o orzamento previsto, e os socios fixeron varias propostas.


Acabamos rondando as dúas da tarde, e algúns xa nos quedamos alí para o Curso de carpintaría, que celebra a súa XI xornada.

Na xornada de hoxe, os alumnos seguiron forrando a buceta.


Estanse achegando ó seu remate e vense moi entusiasmados. Todos o estamos, os alumnos, o mestre e Os Patexeiros como organizadores.



Hoxe, Jose Carballo púxose a copear.



E Moncho seguía co frasquiado, do que xa se está convertindo nun auténtico mestre.


Cara ó remate da xornada tocóulles meter os pechos, e estaban colocando as tracas axeitadas.


Tamén estiveron lixando o forro, para ir deixando as táboas a paño e ver como iba quedando o barco coas formas xa redondeadas.


 Así quedou a buceta ó remate da xornada.



A vindeira semán, posíblemente a deixen alistada polo casco, e lle den a volta para facerlle cornamusas, fogonadura, etc...

Palmeirán

martes, 11 de febreiro de 2014

Exposición Tempos de Vela

Paseando fai uns días pola Pobra do Caramiñal, nun momento deses poucos que nos deixou a climatoloxía sair á rúa, colléume de repente unha forte chuvieira á altura da Casa de Cultura Raquel Fernández Soler, e que mellor momento para visitala, pois nunca o fixera.

Nada máis entrar quedéime gratamente sorprendido ó ver moitos cadros de veleiros. Pero qué pasa aquí?

Resulta que esa Casa de Cultura é a sede permanente da exposición Tempos de Vela, que xa estivera  fai moitos anos, no 2005, na Aula de Cultura de Caixa Galicia en Santiago.


Trátase dunha exposición de cadros e fotografías dos veleiros galegos do século XIX e dos primeiros vapores,  reproduccións dos lenzos que mandaban pintar, dos seus barcos, os armadores da época.

Entre esas imaxes hai barcos moi interesantes como por exemplo a corbeta Tula, propiedade de D.José Colomer Soler (de Riveira)  e D.Lázaro Fernández Seoane (de Palmeira), construído no 1882 na Graña-Ferrol.


A corbeta Gwendoline, construída en Dean Grande (Riveira), propiedade de D.Juan Rey Bretal (de Campelos-Riveira)

O Eladio, que foi o primeiro barco de vapor de Porto do Son, propiedade de D.Mamerto Ferrer Romaní.


 Tamén hai dúas imaxes do María Asumpta, construído no 1858 na praia de Badalona, e que tamén foi galego durante moitos anos, e despois de 136 anos de servicio naufragou tráxicamente á entrada da Ria de Bristol, no 1995.






E moitos e moitos preciosos barcos máis, que inclúen unha pequena ficha cos nomes dos armadores, capitán, ano de construcción e algúns unha pequena historia.


Como a do vapor de pasaxe The Lancer, comprado por D.Enrique del Rio e D.Manuel Barreras en Glasgow, que fora o barco de recreo do Emperador Francisco José de Austria e capturado polos ingleses en Saraxevo. Este barco, facía liña de pasaxe pola Ría de Arousa con saída dende A Pobra do Caramiñal.



A choiva e o mal tempo ás veces tamén serven para descubrir cousas que doutra maneira non veríamos.

Perdoade pola calidade das fotos, foron sacadas cun teléfono, ademáis co obxectivo un pouco empañado pola humidade.
Palmeirán

domingo, 9 de febreiro de 2014

OUTRA XORNADA MÁIS

E continúa a bo ritmo, a construcción da buceta no Curso de carpintaría.


Hoxe seguiron frasquiando e bordeando.

Os alumnos están moi entusiasmados con ver a buceta rematada. E non lle chegan as horas que sempre quedan máis tempo. Pepe vailles ter que deixar a chave, porque ás veces se tiran alí ata pasadas as nove da noite.

Algúns xa manexan complétamente o arte do frasquiado.


Dolores xa consigueu dominar o corte coa serra de cinta.


Lino confesa que aprendeu que neste oficio o "a ollo" e o "ir  facendo" tamén son moi importantes.

Agora xa non lle preguntan tanto a Pepe, xa son autónomos,  frasquían, fan a plantilla, despezan a táboa, féndenna ó medio, córtana coa forma axeitada, repásana co cepillo, aséntana, crávana e botan as puntas, sempre coa supervisión do mestre pero xa como un proceso habitual.


Gustavo, Daniel, Lino e Rogelio formaron un bo equipo para ir traballando na banda de babor.


Moncho, Dolores e Jose estiveron pola banda de estribor.


Javier e Rafa, estaban polas dúas bandas.



Hoxe faltáronnos uns cantos alumnos, cando veñan para a seguinte xornada van quedar sorprendidos de todo o traballo que fixeron os compañeiros este sábado.

Hai táboas que fai falla virar moito para axeitalas ó sitio, os alumnos van a mollalas para poder traballalas mellor.

Uns van ó mar, como debe ser, coa auga salgada.


Incluso arriscando a coller unha molladura por mor do mar de fondo.



Outros, son cans vellos, xa as saben todas e prefiren ír á villa, que lles queda máis á man.

Moncho, Moncho, que xa sabes que eu son como os de "O que o ollo non vé"!!!!!!!!

Hoxe, tiveron que facer un novo procedemento "o copeo", porque xa se aproximan a partes onde as cadernas teñen moita curvatura e hai que "copear" a traca, o bance, para axeitala á curva da caderna.


Este copeo faise cun cepillo con forma e folla convexos.

Podédelo apreciar na seguinte foto.



Ó remate da xornada, quedóunos a buceta tal como vedes.


Como vos comentamos na anterior entrada, imos prolongar un pouco máis o curso, vendo o interés demostrado polos alumnos e coa intención de que vexan rematado o seu traballo e poidamos facernos a foto co barco listo (ou casi).


Podedes ver moitas máis fotos no noso facebook.

Palmeirán





A miña foto
Asociacion cultural en defensa da conservación do patrimonio marítimo, o litoral e a cultura mariñeira. Contacta con nós no CORREO: patexeiros@hotmail.com ou ben no noso FORO: http://patexeiros.foroactivo.com