luns, 25 de novembro de 2013

TERCEIRA XORNADA DO CURSO

Nesta terceira xornada do Curso, non puiden estar presente, polo que vos vou a contar de terceira man o que alí se fixo.

O mestre decideu que era un bo día para meterlle o courel á buceta, e así empezaron coa operación.

O primeiro paso foi meter uns barrotes para sacar as plantillas para cortar o courel.


 Anotaron "o cartamón" ou inclinación dos barraganetes para pasalos á plantilla.


Unha vez feitas as plantillas leváronas ó tablón de carballo para marcalas.


Despezaron o tablón e meteron as pezas na serra.



Alí, como vedes na imaxe, lle deron o "cartamón" axeitado ou o que é o mesmo, a inclinación que ten que levar para axeitarse ós barraganetes.


No descanso, como sempre "mollaron a palleta" e tomaron uns pasteliños, pero hoxe, xusto o día que eu non estou, á compañeira Dolores dóuselle por levar as súas famosas galletas suizas. Eso vou a tardar moito en perdoarllo, a non ser que volva a repetir a operación canto antes.


Unha vez sacadas as pezas, cepilláronas e foron cravándoas nos barraganetes.


Ésta é unha imaxe do traballo feito ó rematar esta terceira xornada.


Decirvos tamén que hoxe se incorporaron dous alumnos máis ó Curso. Esperemos lles sexa productivo.

Palmeirán

sábado, 16 de novembro de 2013

SEGUNDA XORNADA DO CURSO DE CARPINTARÍA

Hoxe xa levamos a buceta que empezamos a construir na anterior edición do Curso, para que os alumnos desta nova edición continúen traballando nela.

Despois do primeiro día de prácticas de afiado e asentado, explicacións sobre a madeira e de como nace unha nova embarcación, hoxe por fin, os alumnos xa puderon empezar a cheirar a madeira.

Nada máis empezar a xornada xa todos se puxeron máns á obra distribuíndose en traballos diversos.

Un grupo púxose a recravar as cuadernas, porque como o carballo estaba moi verde cando se colocaron, traballou moito a madeira e  ó non estar ainda forrado o barco, fixeron mover a cravazón despóis de casi un ano gardada no galpón e ir de exposición en exposición por estrada.

Dolores, Rogelio, Luís e Lino colleron cadanseu martelo e botador e foron recrabando todas as que o necesitaron.

Por outra banda, Oscar e Dani, Javier e Xavier pasaban as táboas que se están preparando para rematar a cuberta pola cepilladora, e Moncho e Rafa as pasaban polo regrueso para deixalas da medida axeitada.

Unha vez preparadas todas as táboas, estiveron atendendo as explicacións de Pepe, que lles iba a ensinar como tiñan que actuar no caso de que tiveran que sustituir uns barraganetes.

Para facer a práctica terán que meter os catro barraganetes da proa da buceta.

Moncho, Lino, Rogelio, Rafa e Javier foron os encargados desta operación, furar o trancanil, darlle a forma e a inclinación, para o que usaron o método manual cun serron de punta fina e o máis moderno da caladora.

O resto do grupo puxéronse a presentar, asentar e cravar as táboas da cuberta que prepararan antes.

Aquí houbo traballo para todos, xa que fixeron grupos para ir atacando por cada banda.

Como me tiven que ir antes, non teño fotos de cómo deixaron o traballo ó rematar a xornada, pero subiréinas en canto mas pasen.

ACTUALIZACIÓN:
Xa acaban de chegar as fotos da última hora no Curso de carpintaría.

Como vedes, a buceta casi queda tapadiña pola cuberta.


Agora haberá que facerlle un pequeno tambucho e darlle unha pequena curvatura para meter o gardaaugas.


Palmeirán


domingo, 10 de novembro de 2013

PRIMEIRA XORNADA DO CURSO DE CARPINTARÍA

Despóis de esperar un pouquiño polos máis rezagados, ás 16:15 de onte sábado dou comezo a 4ª Edición do curso de carpintaría de ribeira e mantemento de embarcacións tradicionais.

Tras a benvida e presentación de todos os alumnos, expoñendo as razóns que lles levaron a facer este curso, explicámoslle os obxectivos deste pequeno curso, que como entenderá todo o mundo, en 40 horas, non os vai a preparar para facer un barco, arte que só se aprende co paso de moitos anos de estar traballando no sector, pero sí lles vai a dar unha idea moi clara de cómo está construído un barco, como se empeza a facer, e os vai a animar a enfrontarse a pequenas reparacións que poidan ter que facer nunha embarcación tradicional.

Tamén, nunha pequena pausa publicitaria, por suposto, xa que organizamos, lles contamos unha breve historia dos Patexeiros, quenes somos, cando nacemos, que facemos, etc....

Unha vez rematada a exposición de quenes son Os Patexeiros, pasamos a distribuir o material de seguridade, guantes, gafas, etc...

E despóis diso xa lle demos paso ós mestres, David e Pepe, que como en todos os cursos anteriores, empezaron por darlles unhas nocións de afiado de ferramentas.


Todos aqueles que tedes asistido a cursos de Prevención de Riscos Laborais, saberedes que unha grande parte dos accidentes laborais producidos con manexo de ferramentas manuais son debidos ás malas condicións das ferramentas. Unha trencha, unha gubia, un cepillo mal afiados, fan que teñas que facer moita máis forza coas ferramentas, podendo dar lugar a accidentes, e facendo que o traballo se alongue e quede mal rematado, polo que das prácticas de afiado e asentado non hai quen se libre nos nosos cursos.

Tras o descanso regulamentario onde os agasallamos cuns refrescos e uns pasteliños, como en todos os cursos que levamos feitos, dou comezo a segunda parte desta primeira xornada.

David explicóulles as propiedades da madeira, o sentido das vetas, as maneiras de cortar para non debilitala, etc... E o interés co que o seguían os alumnos crecía a cada momento. Moitos se sorprenderon cando lles contaba que as grietas na madeira, provocadas polo seu secado, non merman a resistencia da mesma.

Chegou xa o momento de empezarlles a explicar como nacía un barco.

Nesta imaxe vedes ó mestre David, ensinándolles sobre o tableiro de formas, as plantillas dunha buceta
.

E nesta outra imaxe, o mestre lles explica cómo se empezaría dende a talla dun medio modelo en madeira.


Logo se trasladaron arredor da cuberta dun bote que había dentro do taller, dónde o mestre Pepe, lles explica o proceso constructivo do mesmo. Que se poñía a quilla, o codaste, a roda, se armaban as cuadernas mediante o ensamble das varengas e os genoles, etc...

Como debido a duración deste curso, non haberá tempo para empezar un barco, como se fixo no curso anterior, o que se intenta e dar uns coñecementos suficientes para que ó alumno lle quede claro como está armado un barco. Ainda que sí terán a posibilidade de ver como se saca unha cuaderna e se arma.


Ó finalizar a xornada recibimos a visita do vicepresidente da Federación Galega pola Cultura Marítima e Fluvial, que como sempre, lle gusta estar presente cando organizamos algún evento, cousa que lle agradecemos.

Este primeiro día de curso foi casi totalmente teórico, coa excepción das prácticas de afiado e asentado de ferramentas, pero de agora en diante xa terán tempo dabondo para botarlle as máns á madeira.

O vindeiro día vos seguiremos informando das evolucións destes atentos alumnos.

SE ALGÚN MÁIS SE QUERE ANIMAR AINDA ESTÁ A TEMPO!!!!
 NON DIGADES QUE NON VOS AVISAMOS !!!!!!


Palmeirán


venres, 8 de novembro de 2013

MAÑÁN SÁBADO 9 EMPEZA O CURSO DE CARPINTARÍA

Pois así é. Mañán sábado 9 de novembro ás 16:00 horas dará comenzo a IV Edición do Curso de carpintaría de ribeira e mantemento de embarcacións tradicionais organizado pola A.C.M. Os Patexeiros.

Se houbera algún interesado de última hora, pode presentarse mañán entre as 15:30 e as 16:00 horas na Carpintaría de Lorbé, no porto de Lorbé xa disposto a traballar. Tedes toda a información e prezos en entradas anteriores.




A miña foto
Asociacion cultural en defensa da conservación do patrimonio marítimo, o litoral e a cultura mariñeira. Contacta con nós no CORREO: patexeiros@hotmail.com ou ben no noso FORO: http://patexeiros.foroactivo.com