Coincidencias da vida
![Imaxe](https://blogger.googleusercontent.com/img/b/R29vZ2xl/AVvXsEjcC0OBbeYn1Au4V4wM-bgCsZEBR_U4bCGpl4jaH4yMx0zCJ7cnBnzUvQ9WGkX8uc4gfmcIfZc37j66bQvVI5gyBbTurlT8qQjiJrxL2v1UpYLQAQYeVnUvhBScHRB-_XyMOvrzJeBVAVzn/s320/2012-09-13+18.53.34.jpg)
Recordaredes que fai un par de meses vos dábamos conta nesta páxina da operación de rescate dun vello motor Larrán varado nunha praia. Como vos comentábamos daquela, fixéramos o rescate por motivos sentimentais ó tratarse dun motor da marca Larrán, e por motivos ecolóxicos para manter limpa a praia. Fai uns días falando cuns mariñeiros no porto de Lorbé levámonos ademáis unha grata sorpresa ó intentar averiguar de qué barco procedía aquél motor. Pois non volo ides a crer, pero ese motor pertencía ó NELOS, o barco xemelgo da nosa BALBINA, que se fora contra as pedras hai xa varios anos a causa dun forte temporal. O Nelos pertencía ó mesmo armador que a Balbina e tamén se adicaba á captura do patexo. Podédelos ver xuntos nesta foto dos anos 50 na praia de Sada. O que é a vida, rescatámolo sen saber que era da familia. Agora xa forma parte do Museo Patexeiro. Palmeirán