Evolución da Betty

Mañán chuviosa en Lorbé. Alí seguimos traballando na Betty, a ver se a damos alistado para o empece da tempada.
Esta combinación de beige Patexeiros ca madeira vista das cadernas, gústanos a todos.

Levamos xa varias xornadas rascando, quitando pintura, dando alquitrán, saneando en xeral. Tanto fomos saneando que quitamos máis cadernas das que tíñamos pensado nun principio e agora hai que repoñelas.

Estámoslle facendo novas moitas pezas. Vai lento pero de seguro que o barco vai quedar moi reforzado.

O palmeirán rascando, lixando, saneando e pintando e Javier Naveira sacando prantillas,  facendo e asentando as cadernas, estamos levando ó cabo un traballo estupendo, modestia aparte. Non somos profesionais pero facemos o traballo con cariño, e iso nótase. 

Hoxe xa asentamos catro pezas e mañán continuaremos asentando o resto das que temos feitas e cravándoas.

Antes de colocalas, como non, unha manciña de Xylamón fondo. Logo tamén levarán alquitrán, por suposto. Xa sabedes que nós ata llo botamos ó Colacao.

Mentras nós lle dábamos caña ás cadernas,  Ramón, dábanos apoio loxístico, e tamén estivo facendo uns gramiles, que estábamos sen eles. Aquí traballa todo o mundo.