Grazas á Escola Sada e os seus Contornos por axudarnos a manter vivo o noso patrimonio marítimo

 

A Escola Sada e os seus Contornos rematou o curso cun fermoso mercado mariñeiro, unha actividade vinculada ao proxecto MareSada na que participou toda a comunidade educativa. Pulseiras, chaveiros, cadros, imáns, marcapáxinas, camisetas e moitos outros produtos serviron como escusa para compartir unha xornada de convivencia, aprendizaxe e compromiso co noso mar.

O máis emocionante para nós é que a cantidade recadada, 1.044 euros, será doada á Asociación Cultural Mariñeira Os Patexeiros para apoiar a nosa iniciativa do Museo a Flote.

Non temos palabras, nin tipoloxía de letra suficientemente grande, para expresar o noso agradecemento:

GRAZAS POLA VOSA COLABORACIÓN.

Accións coma esta son as que nos alentan a seguir loitando e traballando a prol da conservación do noso patrimonio marítimo. E máis aínda cando quen está detrás son os nenos e nenas, porque eles e elas son, en realidade, os verdadeiros destinatarios do noso traballo.

Se lles fallamos, se non somos quen de conservar o que aínda queda do noso patrimonio marítimo flotante, o día de mañá só poderán coñecer unha buceta, unha chalana, unha dorna ou unha lancha tradicional a través de vídeos, fotografías ou libros. Poderán velas, si, pero non sentilas. Non poderán subir a bordo, tocar a madeira, escoitar o son da auga no casco nin comprender de verdade o que significaron estas embarcacións para a vida das nosas xentes.

Por iso precisamos conservar todo o patrimonio marítimo flotante que aínda resiste. Non como unha peza morta de museo, senón como algo vivo, navegable, compartido e transmitido de xeración en xeración.

Dise moitas veces que a herdanza non é un agasallo dos nosos pais, senón un préstamo dos nosos fillos. Neste caso, esa frase cobra unha realidade especialmente palpable. Os nenos e nenas da Escola Sada e os seus Contornos traballaron, participaron e recadaron 1.044 euros, que agora nos entregan con xenerosidade. Pero non é só unha doazón: é tamén unha responsabilidade.

É un préstamo que nos fan para que lles devolvamos máis patrimonio, máis memoria, máis barcos, máis mar e máis futuro.

Desde Os Patexeiros queremos agradecer profundamente á Escola Sada e os seus Contornos, ao seu profesorado, ás familias e a todo o alumnado a súa implicación, o seu cariño e a súa confianza no noso proxecto.

Grazas por remar connosco.

Grazas por entender que conservar o patrimonio marítimo é tamén educar, transmitir e sementar futuro.

Grazas por axudarnos a facer posible o Museo a Flote.